ബംഗളൂരു: സ്കൂള് വാട്ടര് ടാങ്കില് കീടനാശിനി കലര്ത്തിയ സംഭവത്തില് ശ്രീരാമസേന നേതാവ് ഉള്പ്പെടെ മൂന്നുപേര് അറസ്റ്റില്. കര്ണാടകയിലെ ബെലഗാവിയിലാണ് സംഭവം.
മുസ്ലീമായ പ്രധാന അധ്യാപകനെ സ്കൂളില് നിന്ന് സ്ഥലം മാറ്റാന് വേണ്ടിയാണ് ശ്രീരാമസേന നേതാവ് വാട്ടര് ടാങ്കില് കീടനാശിനി കലര്ത്തിയത്. 13വര്ഷമായി ഈ സ്കൂളിലെ പ്രധാന അധ്യാപകനാണ് സുലൈമാന് ഗൊരിനായിക്ക്. ഇയാള്ക്കെതിരെ സംശയം സൃഷ്ടിക്കുകയായിരുന്നു പ്രതികളുടെ നീക്കം.
വാട്ടര് ടാങ്കിലെ കീടനാശിനി കലര്ന്ന വെള്ളം കുടിച്ച് 12 കുട്ടികളെ ആശുപത്രിയില് പ്രവേശിപ്പിക്കേണ്ടി വന്നു. ആരുടെയും ആരോഗ്യസ്ഥിതിയില് ആശങ്കപ്പെടേണ്ടതില്ലെന്ന് ഡോക്ടര്മാര് അറിയിച്ചു. ശ്രീരാമസേന താലൂക്ക് പ്രസിഡന്റ് സാഗര് പാട്ടീല്, കൃഷ്ണ മദാര്, നാഗന ഗൗഡ പാട്ടീല് എന്നിവരാണ് അറസ്റ്റിലായത്. പ്രതികളെ റിമാന്ഡ് ചെയ്തു.
