ഇലക്ഷന് ചട്ടം ലംഘിച്ചതിന് വിജയ്ക്കെതിരെ അഞ്ചു കേസ്. ഡിഎംകെയ്ക്കെതിരെ ആയിരം കോടിയുടെ അഴിമതി ഉന്നയിച്ച് വിജയ്
തെരഞ്ഞെടുപ്പ് ചട്ടങ്ങള് ലംഘിച്ചുവെന്നാരോപിച്ച് തമിഴക വെട്രി കഴകം (ടിവികെ) നേതാവ് വിജയ്ക്കെതിരെ കേസ്. അഞ്ച് വകുപ്പുകള് ചുമത്തിയാണ് ചെന്നൈ പൊലീസ് കേസെടുത്തിരിക്കുന്നത്. വിജയ്യുടെ പ്രചാരണം പ്രദേശത്ത് ഗതാഗത തടസമുണ്ടാക്കിയെന്നാരോപിച്ച് ഒരു തിരഞ്ഞെടുപ്പ് ഉദ്യോഗസ്ഥന് നല്കിയ പരാതിയെ തുടര്ന്നാണ് കേസ് രജിസ്റ്റര് ചെയ്തത്. പ്രചാരണത്തിന്റെ ദൃശ്യങ്ങളും തെളിവായി സമര്പ്പിച്ചിട്ടുണ്ടെന്നാണ് വിവരം.
പെരമ്പൂര് മണ്ഡലത്തിലേക്ക് നാമനിര്ദ്ദേശ പത്രിക സമര്പ്പിച്ച ശേഷം ഇന്നലെ കൊടുങ്ങയ്യൂരില് വിജയ് പ്രചാരണം ആരംഭിച്ചിരുന്നു. രണ്ട് മണ്ഡലങ്ങളിലാണ് വിജയ് മത്സരിക്കുന്നത്. തിരുച്ചിറപ്പള്ളി ഈസ്റ്റ് ആണ് മറ്റൊരു മണ്ഡലം.ഡി.എം.കെ സര്ക്കാര് ഉപയോഗശൂന്യമായ സര്ക്കാരാണെന്ന് പ്രചാരണത്തിനിടെ വിജയ് ആരോപിച്ചിരുന്നു. തമിഴ്നാട്ടില് പെണ്കുട്ടികള്ക്ക് രാത്രിയില് പുറത്തിറങ്ങാന് കഴിയാത്ത അവസ്ഥയാണ്. മുത്തശ്ശി പോലും സുരക്ഷിതയല്ല. സ്ത്രീകള് സുരക്ഷിതരല്ലാത്ത, ക്രമസമാധാന നില മോശമായ, മയക്കുമരുന്ന് വ്യാപകമായ തമിഴ്നാടിനെ രക്ഷിക്കണം. തമിഴ്നാടിനെ ഈ അവസ്ഥയിലേക്ക് കൊണ്ടുവന്നത് ഡി.എം.കെയാണ്. സ്റ്റാലിന്റെ ഭരണത്തില് ജനങ്ങള്ക്ക് പ്രാധാന്യമില്ല. അദ്ദേഹത്തിന് പ്രധാനം കുടുംബത്തോടൊപ്പം കൊള്ളയടിക്കുകയാണ്. ടാസ്മാക്കില് മാത്രം 1,000 കോടിയിലധികം രൂപയുടെ അഴിമതി. നമ്മുടെ മക്കള് പഠനശേഷം ജോലി തേടി അലയുകയാണ്.
