ആലപ്പുഴയില് പക്ഷിപ്പനി, കോഴി ഉള്പ്പടെ വളര്ത്തുപക്ഷികളുടെ മുട്ട ഇറച്ചി വില്പ്പനയും ഉത്പന്ന വിപണനവും തടഞ്ഞു. ഹോട്ടലുകളിലും വിലക്ക്
പക്ഷിപ്പനി സ്ഥിരീകരിച്ച സാഹചര്യത്തില് ചിക്കണ് വിഭവങ്ങളുടെ വില്പ്പന തടഞ്ഞു. വിപണനം തടഞ്ഞത് ഫുഡ് സേഫ്റ്റി ആന്ഡ് സ്റ്റാന്ഡേര്ഡ്സ് അതോറിറ്റി ഓഫ് ഇന്ത്യ അധികൃതരാണ്. ഹോട്ടലുകളില് കോഴിവിഭവങ്ങള് വിതരണം ചെയ്യുന്നത് തടഞ്ഞു. ഭക്ഷണം കഴിക്കാനെത്തിയവരെ വരെ ഇറക്കിവിട്ടതായി ആരോപിച്ച് ഹോട്ടല് ഉടമകള് രംഗത്തു വന്നു. ഈ മാസം 30 മുതല് ഹോട്ടലുകള് അടച്ചിടാനാണ് തീരുമാനം. എഫ്എസ്എസ്എഐയുടെ നടപടി മുന്നറിയിപ്പ് ഇല്ലാതെയാണെന്ന് ഹോട്ടലുടമകള് പറയുന്നു. സംസ്ഥാനത്ത് പക്ഷിപ്പനി സ്ഥിരീകരിച്ച ഇടങ്ങളില് പക്ഷികളെ കൂട്ടത്തോടെ കൊന്നൊടുക്കുകയായിരുന്നു. ആലപ്പുഴയില് ഇരുപതിനായിരത്തോളം പക്ഷികളെയാണ് കൊന്നൊടുക്കിയത്.
അതേസമയം, ജില്ലയില് പക്ഷിപ്പനി റിപ്പോര്ട്ട് ചെയ്ത സാഹചര്യത്തില് കള്ളിംഗ് നടക്കുന്ന തകഴി, കാര്ത്തികപ്പള്ളി, കരുവാറ്റ, പുന്നപ്ര സൗത്ത്, അമ്പലപ്പുഴ സൗത്ത്, ചെറുതന, പുറക്കാട്, നെടുമുടി, കുമാരപുരം എന്നീ പഞ്ചായത്തുകളുടെ പ്രഭവകേന്ദ്രത്തിന് 10 കിലോമീറ്റര് ചുറ്റളവിലുള്ള സര്വൈലന്സ് സോണില് ഉള്പ്പെടുന്ന ആലപ്പുഴ നഗരസഭ, അമ്പലപ്പുഴ സൗത്ത്, അമ്പലപ്പുഴ നോര്ത്ത്, പുന്നപ്ര സൗത്ത്, പുന്നപ്ര നോര്ത്ത്, പുറക്കാട്, കൈനകരി, ചമ്പക്കുളം, രാമങ്കരി, വെളിയനാട്, പുളിങ്കുന്ന്, നെടുമുടി, തലവടി, മുട്ടാര്, എടത്വ, തകഴി, തൃക്കുന്നപ്പുഴ, ആറാട്ടുപ്പുഴ, കണ്ടല്ലൂര്, പത്തിയൂര്, മുതുകുളം, കരുവാറ്റ, കുമാരപുരം, ഹരിപ്പാട് നഗരസഭ, കാര്ത്തികപ്പള്ളി, ചിങ്ങോലി, വീയപുരം, പള്ളിപ്പാട്, ചെറുതന, ചേപ്പാട്, ചെട്ടികുളങ്ങര, ചെന്നിത്തല, മാന്നാര്, നിരണം, കടപ്ര പഞ്ചായത്തുകളുടെ പരിധിയില് താറാവ്, കോഴി, കാട, മറ്റു വളര്ത്തുപക്ഷികള് ഇവയുടെ മുട്ട , ഇറച്ചി, കാഷ്ടം (വളം), ഫ്രോസണ് മീറ്റ്, മറ്റ് ഉത്പ്പന്നങ്ങള് എന്നിവയുടെ ഉപയോഗവും വിപണനവും കടത്തലും ഒരാഴ്ചത്തേയ്ക്ക് നിരോധിച്ചിരുന്നു.
