ചോക്ലേറ്റ് ഇഷ്ടമില്ലാത്തവർ ചുരുക്കമായിരിക്കും. ചോക്ലേറ്റ് വിഭവങ്ങൾ രുചിച്ചുനോക്കുന്നതിനൊപ്പം അത് സ്വയം നിർമിക്കാനും അവസരം ലഭിച്ചാലോ? സ്വിറ്റ്സർലൻഡിലെ പ്രശസ്തമായ ലിൻഡ്റ്റ് ചോക്ലേറ്റ് കേന്ദ്രം സന്ദർശിച്ച അനുഭവം പങ്കുവെച്ചിരിക്കുകയാണ് ഇന്ത്യൻ കണ്ടന്റ് ക്രിയേറ്റർമാരായ പ്രിയയും സിദും. സൂറിച്ചിലെ ലിൻഡ്റ്റ് ഹോം ഓഫ് ചോക്ലേറ്റിൽ ചോക്ലേറ്റ് നിർമ്മിച്ച അനുഭവമാണ് ഇരുവരും ഇൻസ്റ്റഗ്രാം വീഡിയോയിലൂടെ പങ്കുവെച്ചത്.
ചോക്ലേറ്റ് കേന്ദ്രത്തിലേക്കുള്ള യാത്രയും പ്രവേശന ടിക്കറ്റ് ലഭിക്കുന്നതുമെല്ലാം വീഡിയോയിലുണ്ട്. ചോക്ലേറ്റ് തയ്യാറാക്കുന്ന ഭാഗത്തേക്ക് കടക്കുന്നതിന് മുമ്പ് ഏപ്രണും ഷെഫ് തൊപ്പിയും കൈയുറകളും ഇവർക്ക് നൽകി. അകത്തെത്തിയപ്പോൾ മേശകളിൽ നിറച്ചുവച്ചിരുന്ന മിൽക്ക് ചോക്ലേറ്റും ഡാർക്ക് ചോക്ലേറ്റുമാണ് ആദ്യം ശ്രദ്ധയിൽപ്പെട്ടത്.
ചോക്ലേറ്റ് കണ്ടപ്പോൾ അതിൽ മുഖം മുക്കി കഴിക്കാൻ പോലും തോന്നിയെന്നാണ് പ്രിയ തമാശരൂപേണ പറയുന്നത്. എന്നാൽ അവിടെനിന്ന് ചോക്ലേറ്റ് രുചിച്ചുനോക്കുന്നതിലുപരി സ്വന്തമായി ഒരു ചോക്ലേറ്റ് രൂപം തയ്യാറാക്കാനായിരുന്നു ഇരുവരുടെയും താൽപര്യം.
ടെഡി ബിയറിന്റെ രൂപത്തിലുള്ള ചെറിയ മോൾഡുകളാണ് അലങ്കാരത്തിനായി നൽകിയത്. ചോക്ലേറ്റ് നിറയ്ക്കുന്നതിന് മുമ്പ് ഇരുവരും അതിൽ സ്വന്തം പേരുകൾ കുറിച്ചു. തുടർന്ന് ഷെഫിന്റെ നിർദേശപ്രകാരം മോൾഡിന്റെ ഇരുവശങ്ങളും ചേർത്ത് ചോക്ലേറ്റ് ഒഴിച്ചു. ചോക്ലേറ്റ് നിർമ്മാണത്തിന്റെ ഓരോ ഘട്ടവും ഏറെ കൗതുകകരമായിരുന്നുവെന്നും പ്രിയ വിവരിച്ചു.
തയ്യാറാക്കിയ മോൾഡുകൾ 20 മിനിറ്റോളം ഫ്രീസറിൽ സൂക്ഷിച്ചു. ഈ സമയം ഉപയോഗിച്ച് ഇരുവരും ലോലിപോപ്പുകൾ തയ്യാറാക്കുകയും അലങ്കരിക്കുകയും ചെയ്തു. ഫ്രീസറിൽനിന്ന് പുറത്തെടുത്തപ്പോഴേക്കും പേരുകൾ പതിപ്പിച്ച ചോക്ലേറ്റ് ടെഡി ബിയറുകൾ റെഡിയായിരുന്നു. പ്രതീക്ഷിച്ചതിലും മനോഹരമായി ലഭിച്ച ചോക്ലേറ്റ് രൂപങ്ങൾ ഇരുവരെയും സന്തോഷിപ്പിച്ചു.
ചോക്ലേറ്റ് നിർമ്മാണത്തിന് പുറമെ കേന്ദ്രത്തിലെ കഫേയും ഇരുവരും സന്ദർശിച്ചു. പ്രശസ്തമായ ഹോട്ട് ചോക്ലേറ്റ്, സൂപ്പ്, ചീസ് സാൻഡ്‌വിച്ച് എന്നിവയും രുചിച്ചുനോക്കി. പ്രിയയും സിദും തയ്യാറാക്കിയ ടെഡി ബിയർ ചോക്ലേറ്റിന് വീഡിയോയ്ക്ക് താഴെ മികച്ച പ്രതികരണങ്ങളും ലഭിച്ചു.
https://www.instagram.com/reel/De1fpCtIcUd/?srtk=MWJsb3BxOWg5bGtzMA==
