ലഖ്നൗ: വിവാഹ വിരുന്നിനിടെ അബദ്ധത്തില് വസ്ത്രത്തില് ചിക്കന് കറി തെറിച്ചതിനെച്ചൊല്ലിയുണ്ടായ തര്ക്കം സംഘര്ഷമായി. സംഭവത്തില് ഒരാള് മരിച്ചു. ആറ് പേര്ക്ക് പരിക്കേറ്റു. വരന്റെ സംഘത്തിലുണ്ടായിരുന്ന സുമിത് കുമാറാ(26)ണ് മരിച്ചത്. വിവാഹ ഘോഷയാത്രയ്ക്കിടെ അതിഥിയായെത്തിയ ഒരാളുടെ ദേഹത്താണ് ചിക്കന് കറി വീണത്. സംഭവവുമായി ബന്ധപ്പെട്ട് ആറുപേരെ അറസ്റ്റ് ചെയ്തതായി പൊലീസ് പറഞ്ഞു.
ശുചീകരണ തൊഴിലാളിയായ സമീര് കുമാറിന്റെ വിവാഹ ഘോഷയാത്രയ്ക്കിടെ ഡിജെ സംഗീതത്തിനൊപ്പം അതിഥികള് നൃത്തം ചെയ്യുന്നതിനിടെയാണ് തർക്കം തുടങ്ങുന്നത്. നൃത്തത്തിനിടയില് തുടങ്ങിയ തര്ക്കം പിന്നീട് ഭക്ഷണഹാളിലേക്കും നീങ്ങുകയായിരുന്നു. ഇതിനിടെ ചിക്കന് കറി വിളമ്പുമ്പോള് അബദ്ധത്തില് ഒരാളുടെ ഷര്ട്ടില് തെറിക്കുകയായിരുന്നു. ഇത് വലിയ തര്ക്കമാകുകയും പിന്നീട് സംഘര്ഷത്തില് കലാശിക്കുകയുമായിരുന്നെന്ന് പൊലീസ് പറയുന്നു.
