വീട്ടിലൊരു പുസ്തകക്കൂട്; ലോക വായന ദിനത്തിൽ വേറിട്ട മാതൃകയുമായി ഡോ. സംഗീത് രവീന്ദ്രൻ
തിരുവില്വാമല : ലോക വായന ദിനത്തിൽ പൊതുജനങ്ങൾക്കായി സ്വന്തം വീട്ടിൽ ഒരു ലൈബ്രറി ഒരുക്കി വേറിട്ട മാതൃകയാവുകയാണ് എഴുത്തുകാരനും കവിയും മലയാളം അധ്യാപകനുമായ ഡോക്ടർ സംഗീത് രവീന്ദ്രൻ. വായന മരിക്കുന്നു എന്ന ആശങ്കകൾക്കിടയിൽ, പുസ്തകങ്ങളെ സ്നേഹിക്കുന്നവർക്കായി തന്റെ വീട്ടിലെ ശേഖരം തുറന്നുനൽകിയാണ് അദ്ദേഹം ഈ ദിനത്തെ അർത്ഥവത്താക്കിയത്.
വിദ്യാർത്ഥികൾക്കായുള്ള റഫറൻസ് ഗ്രന്ഥങ്ങൾ, ചരിത്ര പുസ്തകങ്ങൾ, വൈവിധ്യമാർന്ന സാഹിത്യ കൃതികൾ, കവിതകൾ, കഥകൾ, നോവലുകൾ എന്നിവയുൾപ്പെടെ ഏകദേശം ആയിരത്തോളം പുസ്തകങ്ങളാണ് നിലവിൽ ഈ ലൈബ്രറിയിൽ സജ്ജീകരിച്ചിരിക്കുന്നത്. വായനയോടും അറിവിനോടുമുള്ള താല്പര്യം സമൂഹത്തിൽ വളർത്തുക എന്ന ലക്ഷ്യത്തോടെയാണ് ഈ ഉദ്യമം.
ഭാവിയിൽ ഈ സമാഹാരത്തെ കൂടുതൽ വിപുലീകരിച്ച് ഒരു വലിയ പൊതുജന വായനശാലയാക്കി മാറ്റുക എന്നതാണ് തന്റെ പ്രധാന ആഗ്രഹമെന്ന് ഡോ. സംഗീത് രവീന്ദ്രൻ പറയുന്നു. അധ്യാപകന്റെ ഈ മാതൃകാപരമായ പ്രവർത്തനത്തിന് പൂർണ്ണ പിന്തുണയുമായി ഭാര്യ അഞ്ജുവും മക്കളും സുഹൃത്തുക്കളും സജീവമായി ഒപ്പമുണ്ട്. വായനാദിനത്തിൽ നാടിന് വലിയൊരു സന്ദേശം നൽകുന്ന ഈ ലൈബ്രറി ഇതിനകം തന്നെ ശ്രദ്ധേയമായിക്കഴിഞ്ഞു
