പരസ്പര സമ്മതത്തോടെയാണ് ഇരുവരും വേർപിരിഞ്ഞതെന്നാണ് പുറത്തുവരുന്ന വിവരം. കഴിഞ്ഞ ഒരു മാസമായി ഇരുവരും വേർപിരിഞ്ഞാണ് താമസിക്കുന്നതെന്നും റിപ്പോർട്ടുകളുണ്ട്.
ഇരുവരും വിവാഹമോചിതരാകുന്നുവെന്ന തരത്തിൽ നേരത്തെയും നിരവധി അഭ്യൂഹങ്ങൾ പ്രചരിച്ചിരുന്നു. എന്നാൽ ഇതുസംബന്ധിച്ച് ഔദ്യോഗിക പ്രതികരണം ഇരുവരുടെയും ഭാഗത്തുനിന്ന് ഇതുവരെ ഉണ്ടായിട്ടില്ല.
2013ലാണ് വിനു മോഹനും വിദ്യയും വിവാഹിതരായത്. സിനിമയിലൂടെയാണ് ഇരുവരും പരിചയപ്പെടുന്നതും പിന്നീട് പ്രണയത്തിലാകുന്നതും. വീട്ടുകാരുടെ സമ്മതത്തോടെയായിരുന്നു വിവാഹം.
കഴിഞ്ഞ കുറച്ചുനാളുകളായി ഇരുവരും ഒന്നിച്ചുള്ള ചിത്രങ്ങളും വിഡിയോകളും സമൂഹമാധ്യമങ്ങളിൽ പ്രത്യക്ഷപ്പെടാതിരുന്നത് ആരാധകർക്കിടയിൽ ശ്രദ്ധ നേടിയിരുന്നു. വിനു മോഹന്റെ ഇൻസ്റ്റഗ്രാം അക്കൗണ്ടിൽനിന്ന് വിദ്യയ്ക്കൊപ്പമുള്ള ചിത്രങ്ങളും വിഡിയോകളും നീക്കം ചെയ്തതും വേർപിരിയലിനെക്കുറിച്ചുള്ള അഭ്യൂഹങ്ങൾക്ക് ശക്തി പകർന്നു. അതേസമയം, വിദ്യയുടെ ഇൻസ്റ്റഗ്രാം പ്രൊഫൈലിൽ ഇപ്പോഴും വിനു മോഹനൊപ്പമുള്ള ചിത്രങ്ങളും വിഡിയോകളുമുണ്ട്. പ്രൊഫൈൽ പേര് ‘വിദ്യ വിനു മോഹൻ’ എന്നുതന്നെയാണ്.
വേർപിരിയാനുള്ള കാരണം സംബന്ധിച്ച് വ്യക്തമായ വിവരങ്ങൾ പുറത്തുവന്നിട്ടില്ല. ഇരുവരും കരിയറിൽ സജീവമായി തുടരുകയാണ്.
‘നിവേദ്യം’ എന്ന ചിത്രത്തിലൂടെയാണ് വിനു മോഹൻ നായകനായി ശ്രദ്ധ നേടിയത്. തുടർന്ന് നിരവധി മലയാള സിനിമകളിൽ അഭിനയിച്ചു. സിനിമകൾക്കൊപ്പം സ്റ്റേജ് ഷോകളിലും സമൂഹമാധ്യമങ്ങളിലും സജീവമായിരുന്നു.
‘നീലാംബരി’യിലൂടെയാണ് വിദ്യ മലയാള സിനിമയിലെത്തിയത്.
