പാലക്കാട്: സിനിമാമേഖലയിലെ ലഹരിവ്യാപനവുമായി ബന്ധപ്പെട്ട് സര്‍ക്കാരും എക്‌സൈസ് വകുപ്പും സ്വീകരിക്കുന്നത് കര്‍ശന നടപടികള്‍. ഈ വിഷയത്തില്‍ ഒരു മയവും കാട്ടേണ്ടതില്ലായെന്നാണ് തീരുമാനം.
ലഹരിക്കേസുമായി ബന്ധപ്പെട്ട് നടത്തിയ വെളിപ്പെടുത്തലില്‍ നിയമനടപടിയുമായി സഹകരിക്കുമെന്ന് വിന്‍സി അലോഷ്യസ് അറിയിച്ചിട്ടുണ്ടെന്ന് മന്ത്രി എം ബി രാജേഷ് പറഞ്ഞു. ലഹരി ഉപയോഗിക്കുന്നവരോടൊപ്പം അഭിനയിക്കില്ലെന്ന നിലപാട് സ്വീകരിച്ചതിന് പ്രശംസ അറിയിക്കാന്‍ വിളിച്ചപ്പോഴാണ് തന്നോട് നടി നിലപാട് വ്യക്തമാക്കിയതെന്നും അദ്ദേഹം പറഞ്ഞു.
വിന്‍സിയുടെ നിലപാട് ചലച്ചിത്രമേഖലയിലെ എല്ലാവരും സ്വീകരിക്കണം എന്നും ധീരമായ നിലപാട് സ്വീകരിക്കുന്ന വിന്‍സി അലോഷ്യസിനെ പോലുള്ളവരെ സിനിമ മേഖല സംരക്ഷിച്ച് നിര്‍ത്തേണ്ട പ്രാധാന്യത്തെക്കുറിച്ചും അദ്ദേഹം പറഞ്ഞു.
അതേസമയം നാടിനെ പൂര്‍ണമായും ലഹരിയില്‍ നിന്നും മോചിപ്പിക്കുക എന്നതാണ് സര്‍ക്കാരിന്റെ ലക്ഷ്യം എന്നും അതില്‍ സിനിമ മേഖലയെന്നോ മറ്റു മേഖലകള്‍ എന്നോ വ്യത്യാസമില്ലെന്നും അദ്ദേഹം മാധ്യമങ്ങളോട് പറഞ്ഞു.
സെലിബ്രിറ്റി എന്ന പരിഗണനയൊന്നും ആര്‍ക്കുമില്ലെന്നും എംബി രാജേഷ് വ്യക്തമാക്കി. ഉരുക്കു മുഷ്ടി കൊണ്ട് ലഹരിയെ സര്‍ക്കാരിന് അടിച്ചമര്‍ത്താന്‍ സാധിക്കുമെന്ന് അദ്ദേഹം കൂട്ടിചേര്‍ത്തു.
