വേനല്ചൂട് മൃഗങ്ങളിലേക്കും, രണ്ടു പശുക്കള് ചത്തു
കോട്ടയം: കൊടുംചൂട് കന്നുകാലികള്ക്കും വളര്ത്തുമൃഗങ്ങള്ക്കും ആരോഗ്യപ്രശ്നങ്ങള്. പശുക്കള്ക്ക് പാല് ഉത്പാദനം കുറഞ്ഞത് ഉള്പ്പടെയുളള ആരോഗ്യവിഷയങ്ങള്ക്കൊപ്പം കോട്ടയം എറണാകുളം ജില്ലകളിലായി പശുക്കള് ചത്തതായും റിപ്പോര്ട്ടുണ്ട്. പശുക്കള് കുഴഞ്ഞുവീണ് ചാവുകയാണെന്നാണ് കര്ഷകര് പറയുന്നത്. കൂത്താട്ടുകുളം തിരുമാറാടി, കുര്യനാട് എന്നിവടങ്ങളിലാണ് പശുക്കള് ചത്തത്.
അമിത ചൂടു സഹിക്കാനാവാത്തതായിരിക്കാം ജീവന് നഷ്ടപ്പെടുന്നതിന് കാരണമായതെന്നാണ് മൃഗഡോക്ടര്മാര് സംശയിക്കുന്നത്. പശുവിനെ കറന്നശേഷം കിതപ്പ് ലക്ഷണമുളളതായും ചൂണ്ടികാണിക്കപ്പെടുന്നുണ്ട്. സ്ഥിരമായി കുളിപ്പിക്കുന്ന പശുക്കളെയും ചൂട് ബാധിച്ചിട്ടുണ്ട്.
അതിനിടെ ഉയര്ന്ന ചൂടിനെ തുടര്ന്നുളള ജാഗ്രതാ നിര്ദേശം ഇന്നലെയും പുറപ്പെടുവിച്ചു.കേരളത്തില് കഴിഞ്ഞ 24 മണിക്കൂറില് രേഖപ്പെടുത്തപ്പെട്ട ഉയര്ന്ന അള്ട്രാവയലറ്റ് സൂചിക
തുടര്ച്ചയായി കൂടുതല് സമയം അള്ട്രാവയലറ്റ് രശ്മികള് ശരീരത്തില് ഏല്ക്കുന്നത് സൂര്യാതപത്തിനും ത്വക്ക് രോഗങ്ങള്ക്കും നേത്രരോഗങ്ങള്ക്കും മറ്റ് ആരോഗ്യ പ്രശ്നങ്ങള്ക്കും കാരണമായേക്കാം. പൊതുജനങ്ങള് സുരക്ഷാമുന്കരുതലുകള് സ്വീകരിക്കണം.
പകല് 10 മണി മുതല് 3 മണി വരെയുള്ള സമയങ്ങളിലാണ് ഉയര്ന്ന അള്ട്രാവയലറ്റ് സൂചിക രേഖപ്പെടുത്തപ്പെടുന്നത്. അതിനാല് ആ സമയങ്ങളില് കൂടുതല് നേരം ശരീരത്തില് നേരിട്ട് സൂര്യപ്രകാശം ഏല്ക്കുന്നത് പരമാവധി ഒഴിവാക്കുക.
പുറം ജോലികളില് ഏര്പ്പെടുന്നവര്, കടലിലും ഉള്നാടന് മല്സ്യബന്ധനത്തിലും ഏര്പ്പെടുന്ന മത്സ്യത്തൊഴിലാളികള്, ജലഗതാഗതത്തിലേര്പ്പെടുന്നവര്, ബൈക്ക് യാത്രക്കാര്, വിനോദസഞ്ചാരികള്, ചര്മരോഗങ്ങളുള്ളവര്, ആല്ബനിസം അവസ്ഥയുള്ളവര്, നേത്രരോഗങ്ങളുള്ളവര്, ക്യാന്സര് രോഗികള്, മറ്റ് രോഗപ്രതിരോധശേഷി കുറഞ്ഞ വിഭാഗങ്ങള് തുടങ്ങിയവര് പ്രത്യേകം ജാഗ്രത പാലിക്കണം.
പകല് സമയത്ത് പുറത്തേക്ക് ഇറങ്ങുമ്പോള് തൊപ്പി, കുട, സണ്ഗ്ലാസ് എന്നിവ ഉപയോഗിക്കാന് ശ്രമിക്കുക. ശരീരം മുഴുവന് മറയുന്ന കോട്ടണ് വസ്ത്രങ്ങള് ഉപയോഗിക്കുന്നതായിരിക്കും ഉചിതം.
യാത്രകളിലും മറ്റും ഇടവേളകളില് തണലില് വിശ്രമിക്കാന് ശ്രമിക്കുക.
മലമ്പ്രദേശങ്ങള് (High altitudes), ഉഷ്ണമേഖല പ്രദേശങ്ങള് എന്നിവിടങ്ങളില് പൊതുവെ UV സൂചിക ഉയര്ന്നതായിരിക്കും. മേഘങ്ങളില്ലാത്ത തെളിഞ്ഞ ആകാശമാണെങ്കിലും ഉയര്ന്ന UV സൂചികയുണ്ടാവാം. ഇതിന് പുറമെ ജലാശയം, മണല് തുടങ്ങിയ പ്രതലങ്ങള് അള്ട്രാവയലറ്റ് രശ്മികളെ പ്രതിഫലിപ്പിക്കുന്നതിനാല് ഇത്തരം മേഖലകളിലും UV സൂചിക ഉയര്ന്നതായിരിക്കും.
സംസ്ഥാന ദുരന്ത നിവാരണ അതോറിറ്റി സ്ഥാപിച്ച 14 സ്റ്റേഷനുകളിലെ തത്സമയ UV സൂചിക വിവരങ്ങള് https://visualize.openiot.in/d/21I1RLOVJ3/lorawan-kerala-cluster?orgId=2&refresh=30s എന്ന ലിങ്കില് ലഭ്യമാണ്.
