കൊച്ചി : തേവര കോന്തുരുത്തിയില് വീട്ടിലേക്കുള്ള വഴിയില് ചാക്കില്ക്കെട്ടിയ നിലയില് സ്ത്രീയുടെ മൃതദേഹം കണ്ടെത്തി. ജോര്ജ് എന്നയാള് താമസിക്കുന്ന വീടിന് മുന്നിലാണ് അര്ധനഗ്നയായ നിലയില് സ്ത്രീയുടെ മൃതദേഹം കണ്ടെത്തിയത്. മൃതദേഹത്തിന് സമീപത്തായി ജോര്ജും മദ്യലഹരിയില് മതിലില് ചാരിയിരിക്കുകയായിരുന്നു. ഇയാളെ പോലീസെത്തി കസ്റ്റഡിയിലെടുത്തു. മരിച്ച സ്ത്രീയെ ഇതുവരെ തിരിച്ചറിയാനായിട്ടില്ല.
ശനിയാഴ്ച രാവിലെ ആറരയോടെയാണ് നാടിനെ നടുക്കിയ സംഭവം. രാവിലെ ജോര്ജ് ചാക്ക് അന്വേഷിച്ചുനടന്നിരുന്നതായി സമീപവാസികള് പറഞ്ഞു. വീട്ടുവളപ്പില് ഒരു പട്ടി ചത്തുകിടക്കുന്നുണ്ടെന്ന് പറഞ്ഞാണ് സമീപവാസികളോട് ഇയാള് ചാക്ക് തിരക്കിയത്.
എന്നാല്, ഇയാള് മദ്യലഹരിയിലായിരുന്നതിനാല് പലരും ഇയാളെ പറഞ്ഞുവിട്ടു. തുടര്ന്ന് സമീപത്തെ ഒരു കടയില്നിന്നാണ് ജോര്ജ് ചാക്കുകള് സംഘടിപ്പിച്ചു. ഇതിനുപിന്നാലെയാണ് ജോര്ജിന്റെ വീട്ടിലേക്കുള്ള ഇടവഴിയില് ചാക്കില്കെട്ടിയ മൃതദേഹം കണ്ടെത്തിയത്. മൃതദേഹത്തിന് സമീപത്തായി മദ്യലഹരിയിലുള്ള ജോര്ജും ഇരിക്കുന്നുണ്ടായിരുന്നു.
