ബ്യൂണസ് ഐറിസ്: ഇല്ല; നീലയും വെളുപ്പും കലർന്ന അർജന്‍റീനിയൻ കുപ്പായത്തിൽ ഇതിഹാസ താരം ലയണൽ മെസ്സിയെ ഇനി കാണാനാവില്ല. ഫുട്ബോളിൻ്റെ മിശിഹാ അവസാനമായി പന്തുതട്ടി ചരിത്രത്തിലേക്ക് തലയുയർത്തി മടങ്ങി. ബ്യൂണസ് ഐറിസിൽ നടന്ന വികാരനിർഭരമായ വിടവാങ്ങൽ മത്സരത്തിൽ ബെനിനെ എതിരില്ലാത്ത മൂന്ന് ഗോളുകൾക്ക് തകർത്ത് അർജന്‍റീന തങ്ങളുടെ പ്രിയ നായകന് അർഹിച്ച യാത്രാമൊഴി നൽകി. ഒരു ഗോളും രണ്ട് അസിസ്റ്റുകളുമായി കളം നിറഞ്ഞ മെസ്സിയുടെ മാന്ത്രിക മികവിലാണ് അർജന്‍റീന ഈ ഐതിഹാസിക വിജയം സ്വന്തമാക്കിയത്.
റഫറിയുടെ അവസാന വിസിൽ മുഴങ്ങിയപ്പോൾ ഗാലറിയിലെ ആർത്തിരമ്പുന്ന നീലക്കടലിനെ സാക്ഷിയാക്കി സഹതാരങ്ങൾ മെസ്സിയെ വാരിപ്പുണർന്നു. അർജന്റീനൻ ഫുട്ബോളിന്റെ മൈതാനത്ത് ഒരു ദിവ്യനക്ഷത്രമായി ഉദിച്ചു ഉയർന്ന മെസ്സി സമ്മാനിച്ചത്
ഫുട്ബോളിൻ്റെ ഒരു സുവർണ്ണ കാലഘട്ടത്തെയായിരുന്നു. ഐതി ഹാസികമായ ആ ഫുട്ബോൾ ജീവിതത്തിനാണ് ഇതോടെ പൂർണ്ണമായും തിരശ്ശീല വീണത്.
ഗോൾരഹിതമായ ആദ്യ പകുതിക്ക് ശേഷം, രണ്ടാം പകുതിയിലായിരുന്നു മെസ്സിയുടെ മാന്ത്രിക സ്പർശം കണ്ടത്. 48-ാം മിനിറ്റിൽ നിക്കോളാസ് ഒട്ടമെൻഡിയെ ലക്ഷ്യമാക്കി നൽകിയ കൃത്യതയാർന്ന പാസിലൂടെ മെസ്സി മത്സരത്തിലെ ആദ്യ അസിസ്റ്റ് സ്വന്തമാക്കി. ഒട്ടമെൻഡി ഇത് അനായാസം വലയിലെത്തിച്ചു. വൈകാതെ നിക്കോ പാസിന്റെ തകർപ്പൻ കേർളിങ് ഷോട്ടിലേക്കും മെസ്സിയുടെ അസിസ്റ്റെത്തി. ഒടുവിൽ അനുകൂലമായി ലഭിച്ച പെനാൽറ്റി കിക്കിലൂടെ സാക്ഷാൽ മെസ്സി തന്നെ അർജന്‍റീനയുടെ മൂന്നാം ഗോളും നേടിയതോടെ വിടവാങ്ങൽ മത്സരം സമ്പൂർണ്ണമായി (3-0).
