മുഖ്യമന്ത്രിയുടെ ഹെലികോപ്റ്റര്‍ യാത്ര: ഇടപെട്ട് ലോകായുക്ത
തിരുവനന്തപുരം : ചിപ്സാന്‍ ഏവിയേഷന്‍ പ്രൈവറ്റ് ലിമിറ്റഡില്‍ നിന്ന് ഹെലികോപ്റ്റര്‍ വാടകയ്ക്കെടുക്കുന്നതിനുള്ള കരാര്‍ നീട്ടുന്നതോ പുതുക്കുന്നതോ സംബന്ധിച്ച ഏതെങ്കിലും ഫയല്‍ സംസ്ഥാന സര്‍ക്കാരിന്റെ പരിഗണനയിലുണ്ടോ എന്ന് കേരള ലോകായുക്ത ആരാഞ്ഞു.സാമൂഹിക പ്രവര്‍ത്തകനായ കെ. എം. ഷാജഹാന്‍ സമര്‍പ്പിച്ച ഹര്‍ജിയിലാണ് ലോകായുക്ത എന്‍. അനില്‍കുമാര്‍, ഉപലോകായുക്ത അശോക് മേനോന്‍ എന്നിവരടങ്ങുന്ന ഡിവിഷന്‍ ബെഞ്ച് ഇക്കാര്യത്തില്‍ വിശദാംശങ്ങള്‍ തേടിയത്.
ഹെലികോപ്റ്റര്‍ കരാര്‍ പുതുക്കാനുളള കമ്പനിയുടെ നിര്‍ദ്ദേശം സര്‍ക്കാരിന്റെ പരിഗണനയിലിരിക്കെ, അതേ കമ്പനിയുടെ ഹെലികോപ്റ്റര്‍ ഉപയോഗിച്ചതിലൂടെ ഔദ്യോഗിക പദവി ദുരുപയോഗം ചെയ്തു. സ്വജനപക്ഷപാതവും ഭരണപരമായ വീഴ്ചയും വരുത്തുകയും ചെയ്ത മുഖ്യമന്ത്രി സ്ഥാനത്ത് തുടരാന്‍ യോഗ്യനല്ലെന്ന് ഹര്‍ജിയില്‍ ഷാജഹാന്‍ വാദിച്ചു.
നേരത്തെ, 25 മണിക്കൂര്‍ പറക്കുന്നതിന് പ്രതിമാസം 80 ലക്ഷം രൂപ നിരക്കില്‍ ഹെലികോപ്റ്റര്‍ നല്‍കുന്നതിനായി സര്‍ക്കാര്‍ ഈ കമ്പനിയുമായി കരാറിലേര്‍പ്പെട്ടിരുന്നു. ഇത് നീട്ടുന്നതിനുള്ള സംസ്ഥാന പോലീസ് മേധാവിയുടെ ശുപാര്‍ശ സര്‍ക്കാരിന്റെ പരിഗണനയിലായിരുന്നുവെന്ന് ഷാജഹാന്‍ അവകാശപ്പെട്ടു.സംസ്ഥാന സര്‍ക്കാര്‍ തീരുമാനമെടുക്കേണ്ട ഒരു വിഷയത്തില്‍ നേരിട്ടുള്ളതും ഗണ്യമായതുമായ വാണിജ്യപരമായ താല്‍പ്പര്യം കമ്പനിക്ക് ഉണ്ടായിരുന്ന സമയത്താണ് മുഖ്യമന്ത്രി ഹെലികോപ്റ്റര്‍ യാത്ര ചെയ്തതെന്ന് ഷാജഹാന്‍ പറഞ്ഞു.
അതേ കമ്പനിയുടെയോ മറ്റേതെങ്കിലും വ്യക്തിയുടെയോ ഹെലികോപ്റ്റര്‍ വാടകയ്ക്കെടുക്കുന്നതുമായി ബന്ധപ്പെട്ട് മറ്റേതെങ്കിലും അപേക്ഷയോ നിര്‍ദ്ദേശമോ ഫയലോ സര്‍ക്കാരിന്റെ പരിഗണനയിലുണ്ടോ എന്ന് ലോകായുക്ത ആരാഞ്ഞു. അങ്ങനെയുണ്ടെങ്കില്‍, ഇക്കാര്യത്തില്‍ തീരുമാനമെടുക്കാന്‍ അധികാരപ്പെട്ട അതോറിറ്റി സംസ്ഥാന മന്ത്രിസഭയാണോ അതോ ബന്ധപ്പെട്ട മന്ത്രിയാണോ എന്ന് സര്‍ക്കാര്‍ സമിതിയെ അറിയിക്കണം. മലപ്പുറത്തുണ്ടായ ഉരുള്‍പൊട്ടലില്‍ എട്ടുപേര്‍ മരിച്ച സാഹചര്യത്തില്‍ ദുരന്തനിവാരണ പ്രവര്‍ത്തനങ്ങളുടെ ഭാഗമായാണ് യാത്ര നടത്തിയതെന്നാണ് മുഖ്യമന്ത്രി അഭിപ്രായപ്പെട്ടത്.
