കോട്ടയം:ഇടത് സർക്കാരിന് പുതുപ്പള്ളി നിയോജക മണ്ഡലത്തോട് കടുത്ത അവഗണന പുലർത്തുകയാണെന്ന് ആരോപിച്ച് എം.എൽ.എ ചാണ്ടി ഉമ്മൻ്റെ നേതൃത്വത്തിൽ ഉപവാസ സമരം നടത്തി. ഭരണ സംവിധാനത്തിൽ അന്ധമായ രാഷ്ട്രീയ പക്ഷാപാതിത്വമാണ് സർക്കാർ പുലർത്തുന്നതെന്ന് ഉപവാസ സമരം ഉദ്ഘാടനം ചെയ്തു മുതിർന്ന കോൺഗ്രസ് നേതാവ് വി.എം സുധീരൻ പറഞ്ഞു.
പാമ്പാടി ബസ് സ്റ്റാൻഡ് പരിസരത്ത് രാവിലെ 8 മുതൽ വൈകിട്ട് അഞ്ച് മണി വരെയാണ് ഉപവാസം നടക്കുന്നത്.
മദ്യവും മയക്കുമരുന്നും നാട്ടിൽ വ്യാപിക്കാൻ കാരണം സർക്കാരിന്റെ കൃത്യമായ ഇടപെടലുകൾ ഇല്ലാത്തതുകൊണ്ടാണെന്നും, ലഹരി ഉപയോഗത്തിലും, മദ്യഷാപ്പുകളുടെയും കാര്യത്തിൽ മാത്രമാണ് കേരളം ഈ ഇടതു ഭരണ കാലഘട്ടത്തിൽ മുന്നോട്ടു പോയിരിക്കുന്നത് എന്നും വി.എം. സുധീരൻ ആരോപിച്ചു.
രാഷ്ട്രീയ വിരോധം വച്ച് പുലർത്തുന്ന സംസ്ഥാന സർക്കാർ നാടിനെയും ഒപ്പം ജനങ്ങളെയും പൂർണമായും അവഗണിക്കുന്ന സാഹചര്യമാണ് നിലവിലുള്ളതെന്ന് ചാണ്ടി ഉമ്മൻ എംഎൽഎ യും ആരോപിച്ചു.
പാമ്പാടി വില്ലേജ് ഓഫീസ് നിർമ്മാണം,പിഡബൃഡി-പഞ്ചായത്ത് റോഡിന്റെ നവീകരണം, അകലകുന്നം ആയൂർവേദ ആശൂപത്രി , കൂരോപ്പട വില്ലേജ് ഓഫീസ് ഉത്ഘാടനം തുടങ്ങിയവ വൈകുന്നതിൽ പ്രതിഷേധിച്ചും സർക്കാർ പരിപാടികളിൽ നിന്ന് എംഎൽഎയെ മാറ്റിനിർത്തുന്നതിനും എതിരെയാണ് സമരം. കെആർ നാരായണൻ ഫിലിം ഇൻസ്റ്റിറ്റൃട്ട് , പാമ്പാടി ബസ് സ്റ്റാൻഡ് എന്നിവയ്ക്ക് താൻ അനുവദിച്ച ഫണ്ട് ഉപയോഗിക്കാൻ തയാറാകുന്നില്ലന്നും ചാണ്ടി ഉമ്മൻ കുറ്റപ്പെടുത്തി.
