ന്യൂഡൽഹി : കഴിഞ്ഞയാഴ്ച ഇരുസഭകളിലും പാസാക്കിയ വഖഫ് ഭേദഗതി ബില്ലിനെക്കുറിച്ചുള്ള പാർലമെന്റിലെ ചർച്ചയിൽ കോൺഗ്രസ് നേതാവ് രാഹുൽ ഗാന്ധിയുടെ മൗനത്തെ കേന്ദ്ര ആഭ്യന്തര മന്ത്രി അമിത് ഷാ വിമർശിച്ചു. വയനാട് എംപി പ്രിയങ്ക ഗാന്ധി ചർച്ച നടക്കുമ്പോള്‍ സഭയിൽ ഹാജരാകാതിരുന്നതിനെയും അമിത് ഷാ വിമർശിച്ചു. ന്യൂസ് 18 റൈസിംഗ് ഭാരത് ഉച്ചകോടിയിൽ സംസാരിക്കുകയായിരുന്നു അദ്ദേഹം.
പുതിയ നിയമത്തിനെതിരെ മുസ്ലീം സമുദായത്തിലെ ചില നേതാക്കൾ മാത്രമാണ് പ്രതിഷേധിക്കുന്നതെന്നും ഏപ്രിൽ 16 ന് സുപ്രീം കോടതി നിയമത്തെ ചോദ്യം ചെയ്യുന്ന ഹർജികൾ പരിഗണിക്കുമെന്നും അദ്ദേഹം പറഞ്ഞു. ന്യൂനപക്ഷ സമുദായത്തിലെ സ്ത്രീകളും ദരിദ്രരും ശാക്തീകരിക്കപ്പെടുന്നുണ്ടെങ്കിലും കോൺഗ്രസ് നിയമനിർമ്മാണത്തിനെതിരെ പ്രതിഷേധിക്കുകയാണെന്നും അദ്ദേഹം കൂട്ടിച്ചേർത്തു.
“പ്രിയങ്ക ഗാന്ധി വോട്ട് ചെയ്യാതിരുന്നത് എന്തുകൊണ്ട്? ഇതൊരു വലിയ വിഷയമാണെങ്കിൽ രാഹുൽ ഗാന്ധി എന്തുകൊണ്ട് സംസാരിച്ചില്ല? രാഹുൽ ഗാന്ധി പുറത്ത് നിന്ന് വിളിച്ചുപറയുന്നു, തനിക്ക് സംസാരിക്കാൻ അനുവാദമില്ല… എന്തുകൊണ്ട് അദ്ദേഹം സംസാരിച്ചില്ല? പാർട്ടിക്ക് അനുവദിച്ച മുഴുവൻ സമയവും അദ്ദേഹത്തിന് സംസാരിക്കാമായിരുന്നു,” അമിത് ഷാ പറഞ്ഞു.
