കൊച്ചി: വഖഫ് ഭേദഗതി ബില്ല് അംഗീകരിച്ച ലോക്സഭ, രാജ്യസഭകളുടെ നടപടികളെ സ്വാഗതം ചെയ്ത് വരാപ്പുഴ അതിരൂപത. ബില്ല് നിയമമാകുന്നതിന് പിന്നാലെ മുനമ്പത്തെ ജനങ്ങള്‍ക്ക് ആശ്വാസം ഉണ്ടാകണമെന്നും അതിരൂപതാധ്യക്ഷന്‍ ഡോ. ജോസഫ് കളത്തിപറമ്പില്‍.
മുനമ്പത്തെ ഭൂമിയുടെ അവകാശികള്‍ക്ക് എല്ലാ അവകാശവും ലഭ്യമാക്കാന്‍ കേരള സര്‍ക്കാരിന്റെ ദ്രുതഗതിയിലുള്ള പ്രവര്‍ത്തനങ്ങള്‍ ഉണ്ടാവണമെന്നും ആര്‍ച്ച്ബിഷപ്പ് ആവശ്യപ്പെട്ടു. അതേസമയം ഭേദഗതിയിലെ ചില വകുപ്പുകള്‍ മൂലം ബന്ധപ്പെട്ട ന്യൂനപക്ഷങ്ങള്‍ക്ക് ഉണ്ടാകുന്ന ആശങ്കകള്‍ക്ക് പരിഹാരമുണ്ടാക്കണമെന്നും അദ്ദേഹം ആവശ്യപ്പെട്ടു.
ന്യൂനപക്ഷ അവകാശങ്ങള്‍ ആരും കവര്‍ന്നെടുക്കാത്ത രീതിയില്‍ സര്‍ക്കാരിന്റെ ഇടപെടലുകള്‍ ഈ മേഖലയില്‍ ഉണ്ടാകണം. മുനമ്പം വിഷയം പരിഹരിക്കുന്നതിന് വേണ്ടി വഖഫിന്റെ ഭേദഗതികള്‍ ഉപയോഗിക്കണം. വ്യക്തികള്‍ക്ക് നിയമാനുസൃതം തീറ് വാങ്ങിയ സ്വത്ത് സംരക്ഷിക്കുവാനുള്ള നടപടികള്‍ ഈ ഭേദഗതിയുടെ അടിസ്ഥാനത്തില്‍ സമയബന്ധിതമായി ഉണ്ടാകണം. പൊതുവില്‍ ന്യൂനപക്ഷ അവകാശങ്ങളെ ഹനിക്കുന്ന തരത്തിലുള്ള ആശങ്കകള്‍ പരിഹരിച്ച് മുന്നോട്ടു പോകുവാന്‍ കേന്ദ്ര-സംസ്ഥാന സര്‍ക്കാരുകള്‍ ശ്രമിക്കണം.
നാളിതുവരെ മുനമ്പം ജനതയ്ക്ക് ഒപ്പം സമരമുഖത്ത് ആത്മീയമായും ഭൗതികവുമായും സഹകരിച്ച എല്ലാവര്‍ക്കും ആര്‍ച്ച് ബിഷപ്പ് നന്ദി രേഖപ്പെടുത്തി. ജബല്‍പൂരില്‍ ക്രൈസ്തവ സഭാധികാരികള്‍ക്ക് നേരെ ഉണ്ടായ ആക്രമണത്തില്‍ ആര്‍ച്ച് ബിഷപ്പ് അഗാധ ദുഃഖവും പ്രതിഷേധവും രേഖപ്പെടുത്തി.
